Oberländischer Jugendturntag
vom 28. August 2011 in Thun

Liebi Sporteens

Mir möchte mit Öich ufene dänkwürdige Tag zrüggluege, wo üs aune sicher no lang i schöner Erinnerig wird blibe.

Am zwänzg vor sibni het aues agfange. Dir sit zum Bahnhof Toffe cho u wo aui da si gsi, simer zäme mitem Zug uf Thun gfahre. Nachere churze Busfahrt simer im Lachestadion acho u hei üs es gäbigs Plätzli gsuecht. Dir heit Öich umzoge u igwermt u natürlech heit Dir nech’s o nid la näh, mitem eint oder angere Leiter no es Spässli z Tribe, bevor der Wettkampf losgange isch…

Dä Wettkampf isch chli angers gsi, aus Dir Öich das gwanet sit; mir si nämlech aus Gascht-Sektion am Oberländische Jugendturntag gstartet. Dert si d Diszipline chli angers aus am Mittuländische, wo hüür nid stattgfunge het.

Am zäh vor Nüüni isches du losgange mit Pändustafette u Unihockey-Zielschuss. Aus nächschts isch Witsprung u Bauwitwurf ufem Programm gschtange u aus dritts de no Triff & Lauf u Hindernislouf.

Die wo ke Isatz gha hei, si luthaus ga afüüre u hei sech schnäu es paar luschtigi Aafüür-Värsli usdänkt, z.B. „Sporteens Toffe hopp, immer im Galopp!“
Bir aschliessende Mittagspouse heit Dir Zyt gha, näbscht em Picnigge o no chli umeztobe u mit de Leiter e chli ds Chaub z’mache.

Am Namittag hets du no d Plousch-Stafettene gä u wider hei die, wo grad nid si dranne gsi, agfüüret bis si scho fasch nümm hei chönne rede.

Bis ds Rächnigsbüro mit der Ranglischte isch nache gsi, heimer no chönne ds Showprogramm luege u wo du d Rangverkündigung het agfange si aui vor luter Spannig ganz ruhig worde.

Zersch si d Podeschtplätz vo de Plousch-Stafettene verkündet worde u Öii Fröid isch Riesig u der Jubel gross gsi, wo d Sporteens einisch ufem zwöite u einisch ufem dritte Rang si abegläse worde!

Wo’s du zur Rangverkündigung vom Vereinswettkampf cho isch, isch Öii Geduld no einisch gfragt gsi; dert chunnt nämlech immer zersch die füfti Stärkeklass, när geits witer bis zur erschte. Aus gröschti Delegation vom Wettkampf (über 60 Ching) sit Dir natürlech – wie i de letschte Jahr immer – ir erschte Stärkeklass gschtartet; das isch so öppis wie d Königsklass; wär dert gwinnt, isch Wettkampfsieger. U drum chunnt die Stärkeklass o ersch ganz am Schluss dra…

Der Speaker het zersch der dritt u när der zwöit Rang abegläse – Dir sit aber nid derbi gsi… Füre erscht Rang het är’s no einisch richtig spannend gmacht u lang gwartet. Woner du tatsächlech „Sporteens Toffe“ het gseit, het Öich nüt meh chönne brämse. Dir sit füregschtürmt u heit gjublet u gfiiret, es isch e wahri Fröid gsi. U dä orange Huuffe ufem oberschte Podeschtplatz het super usgseh!

Nach der Rangverkündigung isch ds Fescht witergange, Dir heit nech ine wahre Siegesruusch inegschteigeret, so öppis hei mir no nie erläbt. Es isch schön gsi z’ gseh, wie sone dürmischti Truppe (Ching u Jugendlichi vor 2. bis zur 9. Klass) so usglah fiiret. Für z’ zeige, wie schtolz mir uf Öich si, heimer aune no e Glace spändiert u du heimer aus letschte vo aune Vereine der Wettkampfplatz singend u jublend verla – wie sech’s ghört für ne Sieger!

U so isches witergange, bis mir z’ Toffe si acho. Zersch im Bus, när im Bahnhof u im Zug, hei mir lut u fröhlech aune verkündet, dass mir aus Sieger hei gö.

Sporteens, a däm Tag heit Dir’s aune zeigt! Dir heit aus Mannschaft kämpft u heit der Erfoug aus Mannschaft gnosse. Mir si schtouz uf Öich!

Öies Leiterteam

Hie no d’ Resultat:

1. Wettkampfteil

1. Wettkampfteil

1. Wettkampfteil

Unihockey-Zielschuss
Pendelstafette 60m

9.42
8.59

Ballweitwurf
Weitsprung

8.60
8.73

Triff & Lauf
Hindernislauf

8.88
9.01

8.82

8.67

8.97

Total: 26.46

Daniel Kilchhofer

 

Fotos>

Gesamtrangliste>
Rangliste Vereinswettkampf 1. Stärkeklasse>
Ranliste Stafetten>