Samichlous
vom 6. Dezember 2001

HOHOHO!
Zum Glück isch ds Wätter dasmau am Chlousetag nid so schlächt gsi wie a däm ds Jahr vorhär (wär zwar o fasch nid müglech gsi...). Zwar het's ke Schnee gha, derfür het's aber ou nid grägnet. E ganze Huuffe Ching - schier no meh aus färn - si cho, für am Samichlous es Värsli z'verzeue oder es Liedli z'singe. So vieu, dass es der Samichlous ohni si Hiufschlous, sini vier Schmutzline und sini zwöi Eseli gar nid allei präschtiert hätti. Aber schlussändlech het du öppe jedes öppis übercho. Es paar Ching - äuä die wo bsungers brav si gsi - hei sogar no öppis übercho, wo si sech ganz fescht gwünscht hei!
D' Eutere hei sech derwile am Füürli üsserlech und mit Punsch oder Jägertee innerlech warmghaute.
Wo du der Samichlous si Sack het glärt gha, ischer mit sine Häufer wieder gange. Aber mir si sicher, dass är wieder chunnt. U vielech het är nächschts Mau sogar no meh spezielli Gschänkli für die brave Ching...?

Daniel Kilchhofer